傻媽小時候學英文，學的是A for Apple, B for Boy, C for Cat...這大約是我那個年代裡，一般草根幼稚園生的集體記憶。

昨天與大學朋友聚會，由於不少朋友都已有兒有女，席間自然大談湊仔經、入學經。不意之間發現，現時的兩三歲細路，已經不是學A for Apple, B for Boy, C for Cat。而是：

A for Alligator（短吻鱷）

B for Botanic（植物性的）

C for Chimpanzee（黑猩猩）

這天，聽的荒謬事件太多， 真想分享一下。到底是傻媽太天真，還是世界太瘋顛？

**********

●事件一：細路要玩？

朋友甲（大談何為好的幼稚園）：「k1（幼稚園初班）要識50個生字，K2（幼稚園中班）要識100個生字，那樣的學校才算好.... 」

傻媽O哂嘴，嘩一聲說：「細路仔咁細個, 比佢開開心心玩咪算囉！」結果被圍片，朋友甲怒道：「你而家比佢開心，日後佢就傷心啦！」

為甚麼？人生悠悠七十載，其中起碼五十年要捱，點解頭十年都唔可以無憂無慮？「佢會唔會唔開心？細細個就無得玩。」傻媽有點同情小朋友，忍不住插嘴。

朋友甲的女兒，周一至周日，日日學幾樣芭蕾、鋼琴、珠心算、國語、英文....。對於傻媽的無知，她解釋道：「佢（女兒）幾個月大，我就開始帶佢去playgroup, baby gym, .英文班... 佢都未輕鬆過, 點會知咩叫開心丫！」

原來，暪到底也是一項絕招。

●事件二：名校必爭？

席間，提到如何爭入名校。朋友乙指點剛生了女兒的朋友丙訣竅，說：「你個女六個月好去排隊啦！同埋，記得要好似甲咁，帶佢去多啲不同的playgroup玩......」不是三歲才讀幼稚園嗎？六個月大的嬰兒，連企也未識企，去排甚麼隊？

「唉，你識乜丫！」朋友乙不理傻媽，繼續侃侃而談：「仲有呀，你地兩公婆一定要用全英文同個女講嘢，千祈唔可以比佢接觸中文。」又為了什麼？「因為呀，如果你要入英X（名小學）的話，英X揀人，係揀一些全英文家庭行先架，即係話縱使你個女英文都好得，但佢同時識埋中文，英X揀的時候都會排後啲。」

此時，朋友甲插嘴說， 正打算去學國語，原因是她的三歲女兒正在學國語，目的是：「如果(名校)面試時，唔止問英文，仲問埋國語，我個女咪好蝕底！」

傻媽口邊一句話：「（名校）可能仲會問埋日文同法文添，你不如同個女去讀埋。」差點便衝口而出，但諗深一層，若佢take it serious，無疑是令她那可憐女兒更添壓力。這個玩笑似乎開不得，話到嘴邊，還是嚥進肚裡。 

其後，將這日見聞當笑話講給另一個朋友聽。朋友聽罷，笑道：「阿邊個（我們的共同朋友），由於想佢個女報九龍塘某名小學，正諗住用每月萬幾銀的價錢去買個九龍塘假地址。」哈哈大笑之際，朋友又說：「我同阿乜乜（另一個共同朋友）說起這件事，她一點都不覺得出奇，因為她公司正有同事咁做。」

俗說三人成虎，原來再荒謬的事，只要有一群人湧著去做，便成了常理。

●事件三：鬼人高級些？

朋友丙的女兒出生不久，當然問起了名字。

朋友丙說出女兒中文名後，洋洋得意地說： 「女兒的出世紙上，不是好似一般人咁，用中文名的英文拼音。」

一般我們若叫陳小明，出世紙上的便是Chan Siu Ming。但她的女兒......為存忠厚，以假名為例罷，譬如說是叫李小萍，英文名不是Lee Siu Ping，而是Lee Angela Christy（當然這是假名囉）。

「為甚麼呢？」傻媽又不明白了。也曾聽說，有人會在身份證或出世紙，自行加上英文名，如Chan Siu Ming, John；或父母改名時，乾脆不用拼音，直接用英文名，如陳保羅，Chan, Paul等等；可是，倒沒聽說過會用兩個英文名作為名字的。

朋友丙解說：「中間那個是middle name，外國人都係咁改名架。」 朋友丙的丈夫雖在英國讀書，但兩人俱是中國人，為何要學外國人改middle name呢？

本來想問，但席間眾友人對她的主意，讚不絕口。傻媽只好收聲，但腦海中，「崇洋」兩字，揮之不去。
＊＊＊＊＊＊＊

當日所見所聞，全都令人感覺荒謬絕倫，但奇就奇在，席間人人都當作真理般，奉若神明。

回家以後，腦子疲累不堪。阿懵狗出來迎接，隨便摸幾下；看見牠一臉天真傻憨，突然發覺，阿懵可能比不少細路開心。

這些成天珠心算、英文國語、鋼琴芭蕾的可憐孩子們，有哪個去過沙灘？摸過沙子，嗅過海水？踢過浪，捉過海星寄居蟹？哪個可以每天去街街，同朋友們拼命玩個一、兩小時？又有哪個，可以隨心所欲地睡到自然醒來，而不用七點鐘被媽媽叫醒，去上英語唱遊班？

「阿懵，你好幸福呢！」