某日，「防止虐狗協會」接獲匿名舉報。

「敬啟者，

我是一隻路見不平的狗狗。我發現在沙田某屋苑有一個叫傻宅的地方，有一頭叫做『阿懵』的狗狗，被主人傻媽同傻爸嚴重虐待，請各位關注及拯救可憐的阿懵狗罷！

無名義犬上

P.S.我與傻宅係一啲關係都無架，只係路見不平拔刀相助咋！你地唔好誤會呀！」

由於這封信的指控太嚴重；而且，是由一頭戴著眼鏡的狗狗（見下圖）來舉報，所以，不由得引起協會人士的關注──唔......到底這隻阿懵狗，係唔係比主人虐待呢？

（嗱，來舉報的就係呢隻「眼鏡狗」了，係咪好熟口面呢？）

究竟阿懵狗有無被人虐待呢？經過「防止虐狗協會」的調查人員深入追蹤後，果然發現三大可疑罪狀，並迅速拘捕了涉案傻氏夫婦。

●罪狀一：虐打

●證據：後頸狗毛大片脫落（見呈堂證物一號），懷疑被殘酷毒打。

「冤枉呀大人！六月飛霜呀大人！」疑犯傻媽聲淚俱下地大叫：「我只係剃左佢少少毛，用來『滴頸』咋！」

調查人員極度不滿：「隻隻狗都『滴頸』架啦，邊有好似阿懵狗咁，甩左一大片毛架！」

「因為佢怕左個電動剃毛剪，係咁擰來擰去；我逼於無奈先至重手左，剃大忽左啲啲，方便滴囉！」答辯人傻媽如是說。

調查人員向受害人阿懵狗問道：「有無件咁0既事？你有無擰來擰去?」

「梗係無啦，我點會咁細膽噃！」懵狗聲大大咁話。

不過，調查人員都唔係流架，隨即拎出一把電動剃毛剪，並且開動起來，發出「咔啦咔啦」的怪聲。懵狗一聽到怪聲，即刻周身唔聚財，坐立不安；響多幾下，條件反射之下，更加一個屈尾狗鑽左落床下底。

「你又話唔驚？」調查人員「烏」低身，向床下底叫道：「呢埋做咩呀？」

床底下，黑暗中，只聽見一把震震地的WOW　WOW聲，話：「Er.......呢層嘛......」

 （呈堂證物一號：無花無假，足足一張八達通卡咁大。）

＊＊＊＊＊＊＊＊＊＊＊

 ●罪狀二：勞役

●證據：從「見呈堂證物二號」可見，阿懵狗連尾巴都要拎嘢，平時一定working like a dog。

今次的疑犯，係阿懵狗的男主人傻爸。據目擊人士透露，佢親眼睇住傻爸將個環保袋勾喺阿懵狗條尾巴度喎！

「果晚我見到呀！呢個袋係佢個friend，阿Coffee仔架！」目擊者路人甲作供稱：「唔知點解，連佢個friend啲嘢，都要阿懵狗拎埋。好明顯係勞役佢啦！」

咁答辯人傻爸又點講呢？「嘩，好明顯係『老屈』啦！」傻爸大叫：「我地果晚只係測試下佢有幾懵之嘛，你睇，勾個袋係佢條尾度，佢完全唔知呀！just a game！just a game！」

調查人員：「阿懵狗，你認唔認為呢個只係遊戲？」

「梗係唔係啦！」阿懵狗竟然咁大膽屈返傻爸轉頭：「佢地個個都笑我呀，之後！」

「之後？」調查人員再次起疑：「咁你當時究竟知唔知比人勾左個袋喺條尾度？」

「唔.......」阿懵狗即刻詐傻：「你估下.......」

「＃％＊＠︿＄＠＄＃」傻爸同調查人員異口同聲咁講。

 （呈堂證物二號：你估下阿懵狗幾時先知，自己條尾有個袋掛喺度呢？）

＊＊＊＊＊＊＊＊＊＊＊

 ●罪狀三：種族歧視

●證據：嗱，唔駛多講啦，睇睇「呈堂證物三號」就知道了。

調查人員（指住證物三號）：「阿懵狗頭頂果件係咩來？」

「係.......係.......係貓耳仔黎架！嗚嗚.......」阿懵狗即刻淚流滿臉，一副可憐相咁話：「佢地不嬲都好偏心架，淨係錫哂啲貓，特別係果隻又任性又霸道又懶高貴的鴨鴨呀！嗚嗚，而家仲要我扮埋貓添，我話哂都係一隻堂堂大狗來架嘛！」

究竟點解阿懵要扮貓咁可憐呢？調查人員不停喺度諗.......呢單種族歧視案咁大鑊，已經唔係防止虐狗協會可以處理度架啦噃，唔通要轉介去平機會先得？

「咁，你地可唔可以解釋一下，點解狗要扮貓呢？」調查人員忍唔住問吓疑犯夫婦：「解釋唔到的話，我就要正式落案控告你兩個惡主人啦！」

疑犯夫婦喺調查人員耳邊輕輕講左一句話。調查人員點點頭，疑犯夫婦隨即獲得無罪釋放。

到底疑犯夫婦講左句乜嘢咁把炮，令到調查人員咁輕易放左佢地呢？（答案在本版內。）

（呈堂證物三號：懵狗扮貓，靚唔靚女，見仁見智啦！）

答案：因為係萬聖節囉！