好似傻爸話齋：「懵懵就黎多朋友過我！」
男人，可能真係無乜朋友。講到社交能力，似乎連狗都不如噃！好似剛過去的聖誕節，傻爸都係靠住傻媽的人際關係，先有幾場Party去玩吓，但係懵懵呢？HOHO，未到聖誕已經有人約佢去聖誕Party啦！
12月28日，我們一家三口(貓不是party動物，所以選擇留在家中），浩浩盪盪去參加牧羊狗nono的「聖誕暨重生紀念Party」。
睇下，nono個蛋糕幾靚！
（蛋糕上寫著：No爺，You did it, you are so great！究竟是乜嘢一回事呢？）
＊＊＊＊＊＊＊
派對，對於非party動物的男人來說，有甚麼意義呢？答案是司機。不錯，無論是媽媽要去街，或囡囡去參加朋友生日會都好，爸爸的唯一存在意義，就是揸車接送。
這天也不例外。懵懵要去參加派對，傻爸傻媽自然要做「柴可夫司機，接送小朋友去又一村，參加nono的Party。
「嘩，好多狗狗朋友呀！媽媽，你睇下，又見到Gigi啦！」甫到會場，懵懵狗已經好happy地四圍走，同佢啲狗朋友大打招呼。似乎，阿懵的交際手腕尤勝傻爸傻媽喎！
「咦，你睇下，好多嘢食添呀！點解咁筍呀？今日咩日子？」
正當鄉下狗阿懵仲沉醉於繁華爇鬧0既大城市派對中，喺一批見慣大場面啲朋友仔面前大出洋相的時候，忽然之間，被傻媽傻爸一手抱起，原來，係要同與主人家合照喎。
「做咩影相呀？吓，咁多人0既？」未見過世面的阿懵，似乎連派對是乜東東都未知噃，就連同主人家影張靚相呢啲基本動作，亦都失儀。
嗱嗱嗱，好似影相呢剎那，懵狗就發現枱面上有大堆美食，即刻成副心思都去哂啲美食度！喂喂，你係咁咦都應該同主人家nono同埋佢監護人佐治夫婦打個招呼先啦！小朋友，乜咁無禮貌架！
梗係啦，當日「主家席」枱面上，除左有藍莓鬆餅、焗批、曲奇餅等美食之外，仲有大大隻火雞添呀......對於純樸0既阿懵來講，晚餐的急凍雞柳已經係佢所知的「雞」的全部，幾時有見過全雞先？仲要係全火雞添喎，梗係令佢大開眼界啦！
就在懵狗發現火雞的時候，突然之間，另一樣嘢吸引左佢的視線......咦，點解會有個咁靚0既心型蛋糕？邊個結婚定生日呀？
「喂，nono，蛋糕上面有你個名喎，你今日生日咩？」懵懵狗奇道。
nono沒好氣地回應：「今日係慶祝我重生的大日子，梗係要有我個名啦！你見唔見到：I am sooooooooo GREAT！」
懵懵似乎對美食的興趣，大於影張靚相喎！
＊＊＊＊＊＊＊＊
點解一個聖誕party在nono口中，會用上「重生」呢個咁沉重的字眼呢？
話說，十幾歲的nono早前真係死過翻生，因為.......估唔到「牛蜱」呢啲害蟲，竟然會看中了nono，令這頭一心諗住安安樂樂過退休生活的牧羊狗，突然飽受牛蜱熱重病的襲擊。
牛蜱熱是一種由吸血牛蜱引起的疾病，急性感染可導致發燒、厭食、器官衰竭......對普通健康狗狗來說，牛蜱熱已是非常危險的疾病，而對像nono般有點年紀的老狗，就更加係致命重病。因此，當聽見nono生病時，傻媽心裡第一個念頭，就是nono大鑊了，而第二個想法，就是牠主人佐治現在怎樣呢？
傻媽都仲記得，當時同nono的朋友小牧double媽媽，一起去診所探望住院的nono。在路上，心裡一直盤算，到底有幾惡劣呢？
人是一種經驗動物，阿福離世前，傻媽受到主觀因素影響（不想承認牠會離開），差點兒下了一個讓阿福獨自死在診所鐵籠裡的極度錯誤決定。因此，未見到nono時，一直擔心看見與當時阿福一模一樣的景象。
若不幸如此，若nono爸爸亦與傻媽當時的心情一樣的話......若果，真的若果，事情如此糟糕的話，傻媽是否應該鼓起勇氣，向nono爸爸說出難以入耳的說話？例如把握時間帶牠回家......
幸好，nono比想像中好。雖然要輸血，雖然仍然半昏迷，但幸好妹妹Gigi的血型脗合，能夠「瞓身」幫助哥哥度過難關。看見nono，鬆了一口氣，那番可怕的說話總算可以永遠收起來，成為傻媽與懵懵的秘密。＊＊＊＊＊＊＊＊＊＊
甭多說，nono勇敢而且堅強地康復了，回復昔日俊朗。 所以，12月28日，就是歡天喜地的爸媽，為牠辦的慶祝活動。懵懵狗有幸，也在被邀請之列。
天生是PR的阿懵，對於首次參加派對，一點兒也不怯場，穿梭於大狗細狗之間，仲立時學識「乞食」伎倆，扮哂未食過嘢咁，四處成功化緣。
（咁多好嘢食，唔怪得呢幾隻百厭星坐得咁定啦！）
食飽飯，梗係跳返Part舞先啦！懵懵再次遇上Gigi，不過，今次好似唔多啱玩。當然啦，女仔同女仔，跳乜鬼嘢舞噃！嗱，眼前呢位俊男就差唔多啦！
懵懵今次的對手，就係下面呢張相的俊男了。呢位蘇格蘭裔俊男有個靚靚法國名字，不過，懵懵只係鄉下妹，當然唔識讀，而傻媽都係大鄉里，亦唔識串出來。所以，喺呢度只能用「俊男」來形容佢。
據其他家長所講，俊男由於有一身漂亮長毛，極度怕熱，故除了秋冬時節，一向好少外遊；雖然好少露面，但其實係一個派對動物兼舞林高手。阿懵初次參加派對，就遇上俊男；喺俊男的帶領之下，阿懵喺派對中央的舞池，跳左幾part舞，贏盡各方家長的注目禮。
「真係happy呀，媽媽，派對好好玩呀！」回家路上，懵懵與傻媽坐在後座，不停雀躍地說。
至於前座，司機兼保母的傻爸，仍然默默駕駛中......
（懵懵面對俊男，流哂口水咁噃！）
